Kung taga Cebu ka, o kung nakaanhi na ka’g Cebu,
May dako’ng tsansa nga nakadungog naka sa bukira’ng parte sa Sugbo.
Daghan ka’g mabuhat niining lugara:
Pwede ka moadto sa Tops uban sa imong barkada,
Ug inyo’ng tan-awn ang mga bituon sa kalsada.
Pwede pud ka mobisita uban ang imong pamilya,
Ug mag selpi sa mga Pantheon, ug estatuwa sa Temple of Leah.
Kung ganahan ka’g medyo romantiko, ug naa ka’y ikagasa
Nga mga buwak aron motukma sa kagwapa sa imong hinigugma
(siyempre, apil na’ng holding hands, gakos-gakos, ug halok-halok ni’ng eksinaha),
Pwes hawira iya’ng kamot ug agaka iyang tiil paingon sa Terrazas o TIEZA.
Kung ganahan ka, pwede pud ka mosakay ug motor,
Hinatod sa mga moderno’ng kawboy, ikaw iyang tabangan sa imong pag tour2x,
Aron dili ka masaag ug dili ka kapoyon, kay di ra ba lalim motangas sa bukiron.
Ang uban ra ba ana nila kay mga hitsuraan ug gwapo, buotan pa jud!
Basi’g inig suroy nimo’g balik, naa na ka’y kagakos sa motor puhon!
Ang uban pud ana nila kay adunay pamilya.
Pamilya nga giatiman, gipakaon, ug gihigugma.
Ang uban pud ana nila kay maayo nga trabahante.
Nag trabaho mata’g buntag, udto, ug gabi-e,
Dayon mosideline ug drayb kung mabakante.
Kay dili na baya lalim ang ato’ng sistema ug panahon ron.
Kung wala ka’y igong kita, wala jud ka’y igong makaon.
Ayaw kalimot ug pasalamat sa mga moderno’ng kawboy kay wala nakahibaw,
Basi’g kana di ay sila mga maayo’ng taw.
Huwebes, Oktubre kwatro, dos mil disiotso,
Alas-tres sa kadlawn ting kiat sa mga demonyo,
Dunay nahitabo nga patago sa bukira’ng parte sa Sugbo,
Nga asta si Satanas makaingon ug “Yawa!” sa kasubo.
Sa mga mingaw’ng dapit nga gihabolan sa kangit-ngit,
Sa mga sanga ug puno-an sa mga higanteng dakit,
Sa mga balili nga mao’y saksi sa mga hilak ug kasakit,
Sa hangin nga mao’y nakadungog sa buto ug pag shagit,
Sa pusil ug sa mga taw nga nag pakiluoy nga ayaw intawn,
Sila putli ug ginhawa kay sila duna’y mga pamilya,
Nga gapaabot nga makauli sila sa ilaha,
Aron ilang mapakatawa ilang anak ug asawa;
Ang yuta ra sa Malubog ang nakahibaw sa istorya,
Nga gimugna pinaagi sa mga dugo ug bala.
Ang ato’ng gisaligan nga mao’y motapak sa mga buslot,
Ang ato’ng gisaligan nga mao’y motubag sa mga yangungo,
Sa mga taw’ng namatyan ug sa mga dugha’ng gahuot,
Kay mao pa man hinuo’y gihinganlan nga naa’y labot,
Sa doha ka taw’ng nakalingkawas sa dayon nga pagkaala-ot.
Unsa-on pa ta man pag salig sa mga nakauniporme ug bughaw?
Kung sila naman di ay mismo ang tig kalas sa mga taw?
Ug sila naman di ay mismo ang mga tig bira sa gatilyo,
Ug dili na ang wala’y pili nga mata sa hustisya.
Kung taga Cebu ka, o kung nakaanhi na ka’g Cebu,
May dako’ng tsansa nga nakadungog naka sa bukira’ng parte sa Sugbo.
Ang lugar nga kung asa mo makit-an ang puti nga sakyanan,
Kung asa mo makit-an ang mga kuno’y “nadakpan ug nanglaban,”
Nga mga durugista niaging Huwebes, Oktubre kwatro, dos mil disiotso.
Kung taga Cebu ka, nakasiguro ko’ng ikaw ka’y nakadungog,
Sa istorya’ng makaalarma,
Sa mga shagit para sa hustisya,
Sa pakyas ug kadudahan nato nga pulisya,
Sa sugilanong gilubong sa dugo ug bala:
Ang dili makiangayon nga talan-awon sa Malubog.
Kregian Vareare P. Miral
10-15-2018
12:08